Śrīnivāsa Gadyam Author: Śrīraṅga Sūri, of Śrīśaila Ānanta Sūri vamsa Source: Veṅkaṭeśa Kāvyakalāpa (Telugu), encoded Malleswara Rao Yellapragada, sanskritdocuments.org || śrīrastu || śrīveṅkaṭādrinilayaḥ kamalākāmukaḥ pumān | abhaṅgura vibhūtirnastaraṅgayatu maṅgalam śrīmadakhila mahīmaṇḍala maṇḍana dharaṇidhara maṇḍalākhaṇḍalasya || 1|| nikhila surāsura vandita varāha kṣetra vibhūṣaṇasya || 2|| śeṣācala garuḍācala vṛṣabhācala nārāyaṇācalāñjanācalādi śikhari mālākulasya || 3|| nāthamukha bodhanidhi vīthiguṇa sābharaṇa sattvanidhi tattvanidhi bhaktiguṇapūrṇa śrīśaila pūrṇa guṇavaśaṃvada paramapuruṣa kṛpāpūra vibhramadatuṅgaśṛṅga galadgagana gaṅgāsamāliṅgitasya || 4|| sīmātigaguṇa rāmānuja muni nāmāṅkita bahubhūmāśraya suradhāmā layavanarāmā yatavanasīmā parivṛta viśaṅkaṭataṭa nirantara vijṛmbhita bhaktirasa nirjharānantāryāhārya prasravaṇa dhārāpūra vibhramada salilabhara bharita mahā taṭākamaṇḍitasya || 5|| kalikardamamalamardana kalitodyama vilasadyamaniyamādima munigaṇa niṣevyamāṇa pratyakṣībhavannijasalila samajjananamajjana nikhila pāpanāśana pāpanāśana tirthādhyāsitasya || 6|| murāri sevaka jarādhipīḍita nirārtijīvana nirāśabhūsura varātisundara surāṅganā ratikarāṅga sauṣṭhava kumāratākṛti kumāratāraka samāpanodaya damānapātaka mahāpadāmaya vihāpanodita sakala bhuvana vidita kumāradhārābhidhāna tirthādhiṣṭhitasya || 7|| dharaṇi talagata sakalahata kalilaśubha salilagata bahulavividha malahati catura ruciratara vilokamātravidalita vividha mahāpātaka svāmipuṣkariṇī sametasya || 8|| bahusaṅkaṭa narakāvaṭa patadutkaṭa kalikaṅkaṭa kaluṣodbhaṭa janapātaka vinipātaka rucināṭaka karahāṭaka kalaśāhṛta kamalārata śubhamajjana jalasajjana bharita nijadurita hatinirata janasatata nirargalapeyīyamāna salila sambhṛta viśaṅkaṭa kaṭāhatīrtha bhūṣitasya || 9|| evamādima bhurimañjima sarvapātaka garvahāpaka sindhuḍambara hāriśambara vividhavipula puṇyatīrtha nivaha nivāsasya || 10|| śrī veṅkaṭācalasya || 11|| śikharaśekhara mahākalpa śākhī || 12|| kharvībhavadatigarvi kṛtagurumerviśa girimukhorvīdharakuladarvīkara dayitorvī dharaśikharorvī satata sadurvī kṛticaṇanavaghanagarvacarvaṇanipuṇa tanukiraṇa masṛṇita giriśikharaśekhara tarunikara timiraḥ || 13|| vāṇīpati śarvāṇīdayitendrāṇīśvaramukhanāṇīyo rasaveṇī nibha śubhavāṇī nutamahimāṇī yastarakoṇī bhavadakhilabhuvana bhavanodaraḥ || 14|| vaimānika gurubhūmādhika guṇa rāmānuja kṛtadhāmākara karadhāmāridara lalāmāccha kanaka dāmāyita nijarāmālayanavakisalayamaya toraṇa mālāyitavanamālādharaḥ || 15|| kālāmbuda mālānibha nīlālaka jālāvṛta bālābja salīlāmalaphālāṅka samūlāmṛta dhārādvayāvadhīraṇa dhīralalitatara viśadatara ghana ghanasāramayordhvapuṇḍra rekhādvayaruciraḥ || 16|| suvikasvaradalabhāsvarakamalodaragatameduranavakesaratatibhāsuraparipiñjara kanakāmbarakalitādaralalitodaratadālambajambharipumaṇistambha gambhīrimadambhastambhana samujjṛmbhamāṇapīvaroruyugala tadālambapṛthulakadalīmukulamadaharaṇajaṅghālajaṅghāyugalaḥ || 17|| navyadala bhavyakala pītamala śoṇimala sanmṛdula satkisalayāśrujalakāri balaśoṇatala patkamalanijāśraya balabandīkṛta śaradindumaṇḍalī vibhramadādabhraśubhra punarbhavādhiṣṭhitāṅgulī gāḍhanipīḍita padmāsanaḥ || 18|| jānutalāvadhilambhiviḍambita vāraṇaśuṇḍā daṇḍavijṛmbhita nīlamaṇimaya kalpakaśākhā vibhramadāyi mṛṇālalatāyata samujjvalatara kanaka valayavellitaikatara bāhudaṇḍayugalaḥ || 19|| yugapadudita koṭikharakara himakara maṇḍala jājjvalyamāna sudarśana pāñcajanya samuttuṅgita śṛṅgāparabāhuyugalaḥ || 20|| abhinavaśāṇā samuttejita mahāmahānīlakhaṇḍa madakhaṇḍananipuṇa navīna paritapta kārtasvarakavacita mahanīya pṛthulasālagrāma paramparāgumphita nābhimaṇḍalaparyanta lambamānaprālambadīpti samālambita viśālavakṣasthalaḥ || 21|| gaṅgājharatuṅgākṛtibhaṅgāvalibhaṅgāvaha saudhāvali bāvaha dhārānibha hārāvali dūrāhata gehāntaramohāvaha mahima masṛṇita mahātimiraḥ || 22|| piṅgākṛtibhṛṅgārunibhāṅgāra dalāṅgāmala niṣkāsita duṣkāryagha niṣkāvali dīpaprabha nīpacchavi tāpaprada kanakamālikā piśaṅgitasarvāṅgaḥ || 23|| navadalita dalavalita mṛdulalita kamalatati madavihati caturatara pṛthulatara sarasatara kanakasara mayarucira kaṇṭhikā kamanīyakaṇṭhaḥ || 24|| vātāśanādhipatiśayana kamanaparicaraṇa ratisametākhila phaṇadharatati matikara kanakamaya nāgābharaṇa parivītākhilāṅgāvagamita śayana bhūtāhirāja jātātiśayaḥ || 25|| ravikoṭī paripāṭī dharakoṭira varāṭīkitavāṭi rasadhāṭi dharamaṇigaṇa kiraṇa visaraṇa satatavidhuta timiramohagarbhagehaḥ || 26|| aparimita vividhabhuvanabharitākhaṇḍa brahmāṇḍamaṇḍala picaṇḍilaḥ || 27|| āryadhuryānantārya pavitrakhanitrapāta pātrīkṛta nijacubukagata vraṇakiṇa vibhūṣaṇavahana sūcitaśrita janavatsalatātiśayaḥ || 28|| maḍḍuḍiṇḍima ḍamarujharjhara kāhalī paṭahāvalī mṛdumardalāli mṛdaṅga dundubhi ḍhakkikāmukha hṛdyavādyaka madhuramaṅgala nādamedura visṛmara sarasagāna rasarucira santatasantanyamāna nityotsava pakṣotsava māsotsava saṃvatsarotsavādi vividhotsava kṛtānandaḥ || 29|| śrīmadānandanilayavimānavāsaḥ || 30|| satatapadmālayāpadapadmareṇusañcita vakṣassthalapaṭavāsaḥ || 31|| śrīśrīnivāsassuprasanno vijayatām || 32|| śrīraṅgasūriṇedaṃ śrīśailānantasurivaṃśyena | bhaktyā racitaṃ hṛdyam gadyam gṛhṇātu veṅkaṭeśānaḥ || || śrī śrīnivāsagadyaṃ sampūrṇam || ## From a Telugu book Veṅkaṭeśa Kāvyakalāpa Encoded and proofread by Malleswara Rao Yellapragada https://sanskritdocuments.org/doc_vishhnu/shrInivAsagadyam.html